Kirsâglâ

Bhoda Hap

Kunbâ tarilâ ekra ghopani ekong dangosa hulung thakibân ble.
Aro ôy hulungte ekra burâ bhoda hap thakibân.
Ôy hulungtey bhoda hapra madhay dinâ thokon puri thakibân ble.
Bhoda hapra hulungte puri thakiyâ bhokote morong-morong huyâ Bhogobangon bor magiyâ
kule, "Hay Bhogoban! Moy ki ingkâkey bhokotey muribô, mola uphurni tola ki aro ektepaw
maya nây?"
Bhogobanda bhoda hapla bor magara huniyâ maya lagile aro ghogla-beng ekra pathe dile.
Kintu ghogla-bengra tamte Bhogobanla bokto hubân.
Bhoda hapra muk agte bengragon dikhiyâ logeloge ha ke mukrâ meleya ghapatke bengragon
dhurile.
Ghogla-bengra ingkâ nekhan dinâ dikhibâ lagate monot khob duk pale.
Aro oy Bhogobangon pusi cawa nekhan bor magiyâ koy, "Moy ki pap kurile Bhogoban?
Moge ingkâ nekhan din dikhâle!"
Bhogobanda bekong jhonla bor magara huniyâ ki korong nakorong hule.
Aro pasekon uglâlâ kanotey kuwâ nekhanke kule, "Jingkây huse ungkây thak."
Ghogla-bengra Bhogobanla kothara bujile aro oy haprala mukhut mora nekhan kuriyâ thakile.
Bhoda hapra bengragon murile ke bhabiyâ mukrâ meleya gilibâ cawate phollokke phal diyâ
palale.
Burâ bhoda hapra ha ke câyây thakile.
"Jala borat nây, biyâ ghorto bhat nây."

Kâwâ aro Corekani

Ekra corekani aro ekra kâwâ bekong jhon khub bhala log hubân ble.
Madhay dinâ age kâwârâhe khub âwâl dekhibân aro corekanirâhe bedhoka hubân ble.
Ora bekong jhon bekong jhonla duk-sukni hase kande.
Ek dinâ corekanirâgon alga pukhiglâ umâglâ logon khaba dakale.
Corekanirâ nijâgon bedhoka dekhebede jaba las pâyâ kâwârâgon koy, "Humas, toy ki moge
tola dhokra dibo?"
Kâwârâ congkhiyâ koy, "Mola âwâl dhokra toge kene dibo!"
Corekanirâ bibak kothaglâ kâwârâgon kule.
Kâwârâ koy, "Moy toge mola âwâl dhokra deba pabo, kintu toi moge kotha deba lagibo ji, toi
abar udâ ghuriyâ dibo. Tahole he moy toge mola dhokra dibo."
Corekanirâ khusi huyâ kâwâlâ âwâl dhokra niyâ alga pukhiglâ logon khaba jale.
Corekanilâ alga pukhi humasglâ oge buddi dile ji, kâwâlâ âwâl dekhara ogon abar ghuriyâ
diba nalage.
Corekanirâo ola alda logglâlâ kotha huniyâ dhuri phelale.
Kâwârâ besra bhiyân thiki belabhati pâyâ basneya thakile, kintu corekanirâ kunudinâw ghur
naahile aro ghuri nadile.
Udâ bedehe corekanirâ âskâ ettoy âwâl dekhe aro kâwâ, besra, kala cukcukâ, bedhokake
thakibâ lagile.